Myndlistarmaður ársins 2019: Eygló Harðardóttir
![Islensku myndlistarverdaunin 2019: Eygló Harðardóttir](/_next/image?url=https%3A%2F%2Fmyndlistarmidstod.payload.is%2Fmedia%2Fislensku-myndlistarverdaunin-2019-eyglo-hardardottir-2000x1333.jpg&w=2048&q=80)
Eygló Harðardóttir var valin Myndlistarmaður ársins fyrir sýninguna Annað rými, Nýlistasafninu.
Í umsögn dómnefndar kemur fram:
Eygló Harðardóttir (f. 1964) hlýtur Myndlistarverðlaun ársins 2019 fyrir sýninguna Annað rými í Nýlistasafninu sem bar titil sinn með rentu. Með verkum sem í senn voru fínleg og stórkarlaleg, unnin í viðkvæman efnivið, opnaði listakonan fyrir gáttir sem áhorfandinn gat smeygt sér inn fyrir og aukið skynjun sína og næmi á kostnað hinnar vanabundnu rökhyggju.
Í tæpa þrjá áratugi hefur listsköpun Eyglóar fléttast saman við störf hennar sem listkennara annars vegar, og landvarðar á hálendi Íslands hins vegar. Skilningur hennar og virðing fyrir efni og eðli þess, hefur kallast á við skoðun á viðkvæmustu þáttum í lífríki og umhverfi Íslands, og hvort tveggja undirbyggt einstakan næmleika í listkennslu þar sem hún leiðbeinir ungu fólki á mótunarárum þess.
Það er mat dómnefndar að öll helstu einkenni listakonunnar hafi komið fram á sýningu Eyglóar í Nýlistasafninu: ástríða fyrir myndlist, óheft sköpun, djúpstæð forvitni um virkni þess óræða, miðlun og kennsla sem felst í því trausti sem hún sýndi áhorfendum til þátttöku í sköpuninni.
![Islensku myndlistarverdaunin 2019: Eygló Harðardóttir, Annað rými, 2018](/_next/image?url=https%3A%2F%2Fmyndlistarmidstod.payload.is%2Fmedia%2Fislensku-myndlistarverdaunin-2019-eyglo-hardardottir-annad-rymi-2018-2000x1334.jpg&w=2048&q=80)
Annað rými, Nýlistasafnið. Ljósmynd: Helga Óskarsdóttir.
![Íslensku myndlistarverðlaunin 2019 - Eyglo Hardardottir - Annad rymi. Ljosmynd: Vigfús Birgisson.](/_next/image?url=https%3A%2F%2Fmyndlistarmidstod.payload.is%2Fmedia%2Fislensku-myndlistarverdlaunin-2019-eyglo-hardardottir-annad-rymi.-ljosmynd-vigfus-birgisson-2000x1333.jpg&w=2048&q=80)
Annað rými, Nýlistasafnið. Ljósmynd: Helga Óskarsdóttir.