Myndlistarmenn ársins: Bryndís Snæbjörnsdóttir & Mark Wilson
Bryndís Snæbjörnsdóttir og Mark Wilson hlutu myndlistarverðlaun ársins 2022 fyrir sýninguna Vísitasíur í Listasafninu á Akureyri.
![](/_next/image?url=https%3A%2F%2Fmyndlistarmidstod.payload.is%2Fmedia%2Fbryndis-og-mark-islensku-myndlistarverdlaunin-2022.-ljosm-owen-fiene-2000x1333.jpg&w=2048&q=80)
Í umsögn dómnefndar kemur fram:
„Sýningin er afrakstur margra ára rannsóknarverkefnisins Ísbirnir á villigötum sem þau hafa unnið í samvinnu við sérfræðinga á sviði þjóðfræði, náttúru- og umhverfisfræði. Verkefnið snýst um að auka þekkingu á tengslum dýra, manna og umhverfis á tímum hamfarahlýnunar. Til þess er sjónum beint að hvítabjörnum á Íslandi í fortíð og nútíð. Verkin á sýningunni varpa ljósi á spurningar um náttúruvernd, skoða frásagnir af árekstrum fólks og hvítabjarna í gegnum tíðina og hvað það er sem gerist þegar þessi tvö rándýr mætast.“
„Ferill þeirra er fjölbreyttur og þau hafa nýtt rannsóknaraðferðir samtímalistar til að eiga í samtali við rannsóknir á öðrum sviðum, svo sem náttúruvísindum, þjóðfræði og umhverfisfræðum. Þau líta svo á að aðferðir samtímalistar geti fært mikilvæga viðbót í samtal milli ólíkra fræðigreina og beint sjónum í nýjar og óvæntar áttir.
Þau Bryndís og Mark nýta fjölbreyttar aðferðir við framsetningu verka sinna, þar sem samspil myndbandsverka, fundinna hluta, teikninga, ljósmynda og ýmissa gagna mótar innsetninguna í samhengi við hvern og einn sýningarstað. Innsetning þeirra í Listasafninu á Akureyri var í senn áhrifarík og fræðandi og myndaði áhugaverða heild í rými safnsins.“
![Islensku myndlistarverdlaunin 2022 - Bryndís Snæbjörnsdóttir & Mark Wilson Ljósmynd: Margrét Seema Takyar](/_next/image?url=https%3A%2F%2Fmyndlistarmidstod.payload.is%2Fmedia%2Fislensku-myndlistarverdlaunin-2022-bryndis-snaebjornsdottir-and-mark-wilson-ljosmynd-margret-seema-takyar-2000x1331.png&w=2048&q=80)
Bryndís Snæbjörnsdóttir & Mark Wilson. Ljósmynd: Margrét Seema Takyar.