Sýningin er afmælissýning Slunkaríkis en á þessu ári eru liðin 40 ár frá því að Myndlistarfélag Ísafjarðar stofnaði galleríið. Lengi vel var Slunkaríki til húsa að Aðalstræti 22 sem nú hýsir Gallerí Úthverfu en fluttist í Edinborgarhúsið við opnun þess árið 2007.

Í tilefni af þessari 40 ára sögu efna Slunkaríki og Úthverfa til fölbreyttrar dagskrár á afmælisárinu. Samhliða opnuninni í Edinborgarhúsinu þann 18. júlí verður einnig sýningaropnun í Úthverfu.

Gallerí Slunkaríki hefur alla tíð lagt ríka áherslu á samtímalist og því þótti við hæfi að fá tvo unga listamenn til að sýna í tilefni afmælisins.

Á sýningunni verður að finna fjölbreytt verk eftir þau Loga og Unu, meðal annars fundin pappírsverk, málmskúlptúra, staðnaða skugga og endurtekin umhverfishljóð. 

Logi Leó Gunnarsson og Una Björg Magnúsdóttir hafa unnið samhliða að list sinni síðastliðin tíu ár, sýnt saman en aldrei viljandi. Þetta er þeirra fyrsta samsýning. 

Logi Leó Gunnarsson (f. 1990) útskrifaðist frá myndlistardeild Listaháskóla Íslands vorið 2014. Upphafspunkturinn í verkum hans eru yfirleitt hljóð. Hann vinnur oft með hugmyndina um augnablik í skúlptúrum sínum og innsetningum. Í því felst oft að finna lykkju í hreyfingu, einangra hana, gefa henni óskipta athygli og finna í henni hið óvænta og einfalda. Logi Leó hefur nýlega tekið þátt í sýningum í Nýlistasafninu (2024) Listasafni Reykjavíkur (2023), ARS LONGA samtímalistasafni á Djúpivogi (2022), Y gallery í Kópavogi (2022) og í One Minute Space í Aþenu (2021). Hann býr og starfar í Reykjavík.

Una Björg Magnúsdóttir (f. 1990) beitir ýmsum brögðum í verkum sínum til að velta upp spurningum um fegurð, gildi, tilvist okkar, hegðun og hátterni. Hún notar til þess áferð og gildishlaðin efni á slunginn en sparlegan hátt. Með nákvæmum uppstil¬lingum á fábrotnum munum skapa verkin ákveðið sýndar¬yfirborð þar sem allt virðist með felldu. En verkin taka á sig háttvísa blekkingu og dansa á óræðum skilum þess raunverulega og eftirlíkingar. Una Björg nam myndlist við Listaháskóla Íslands og stundaði framhaldsnám við ÉCAL í Sviss þaðan sem hún útskrifaðist árið 2018. Hún býr og starfar í Reykjavík. Verk hennar hafa verið sýnd meðal annars í Listasafni Reykjavíkur, Gerðarsafni, Y gallerí, Ásmundarsal, KEIV í Aþenu, GES¬2 í Moskvu og Künstlerhaus Bethanien í Berlín.

Sýningin nýtur stuðnings Uppbyggingarsjóðs Vestfjarða og Sumarviðburðarsjóðs Hafna Ísafjarðarbæjar.